文:MenClub 魏文青  
POSTED ON 17 Jul 2020

愛情呢家嘢有時可以好現實,尤其男性手中嘅工作性質、資源多寡,好多時就係決定個女仔會唔會將開佢…個心房嘅重要原因,咁你話咩工先最吸引女仔?日本節目《今夜くらべてみました》就搞咗個女性票選,選出佢哋覺得最好嘅理想男友職業排行榜,有人睇完話好現實,但有人睇完就話有希望喎!

圖片:graduate_RPG48 on Twitter

節目搵黎包括空姐、模特兒、OL、編輯等138位職業女性,選出最理想男友職業。其中頭五名分別係「超大型地產發展商」、「大型企業出身嘅IT創業家」、「法律三雄」(即係裁判官、檢控官、律師)、「Head Hunting系外資人壽保險公司」,以及「啱啱完成第一次外派工作回歸日本嘅總合商社(你當係業務範圍好廣嘅大企業啦)營業員」,平均年最低都有830萬Yen,即係60萬港紙。難怪日本網民睇到之後話呢個表根本唔係理想男朋友,而係理想ATM…

大家同時亦發現呢個排行榜上面嘅職業分得非常細致,唔單止涵蓋職業本身,仲對公司規模以及工作內容都有要求。例如第六位係機師,但就要係日本航空公司訓練而且唔係廉航嘅機師、第廿一位警察(日本警察呀下)但就唔可以係行咇散仔。

不過!又唔係以為身為普通人嘅你完全冇機會!因為呢三十個排名中,有一個係大家都做到!就係排名第七嘅「十萬以上訂閱Youtuber」!!雖然都唔係容易,但起碼係一個望得見嘅機會!如果大家都有意擠身呢個排行榜呢,就喳喳聲去開返個Youtube Acct試試佢啦!