文:MenClub 魏文青  
POSTED ON 30 Jul 2020

唔少人應該都試過買衫中伏,尤其買平衫呢中伏機率就特別高!不過大多數人中伏,都係因為件衫黎到著上身同睇圖相差好遠,好少有人係著上身冇事,除嗰陣先中伏。

桐沢たえ係一名以「水上庭」為筆名出版小說嘅日本作家,近日就成為網絡熱話,不過唔係因為佢寫嘅小說,而係因為佢買咗件好靚嘅旗袍,影咗幾張靚相之後發現除唔到!

圖片:kirisawatae on Twitter

桐沢たえ由下晝5點就開始喺Twitter求救,話著咗件旗袍之後除唔到,之後求救越黎越激動,仲話唔整甩個膊頭臼嘅話絕對除唔到,然後又因為太激動而身水身汗,件衫更加難除,於是佢又開冷氣開風扇等自己冷靜落黎,期間仲諗起嫲嫲叫過佢唔好買自己除唔到嘅衫,又擔心如果呢個時候有速遞送貨黎自己就英名盡喪,最後等到夜晚十點阿媽返屋企,先由阿媽一路鬧一路幫佢除。結束呢次奇妙嘅經歷。

「嗚呀呀呀呀呀!Cast Off (幪面超人術語)」

成功除到後嘅慶祝文

其中由於佢Twitter上接連Post出自己著住旗袍嘅性感身材及靚樣,後接一張於旗袍中掙扎嘅「顏藝」照而得到接近40000個Re-tweet。