文:MenClub 艾力克  
POSTED ON 03 Feb 2021

唔夠半個月就到情人節,又到各位男士間揭性頭痛嘅日子,大家唔係諗著無晚市就可以走得甩啊?今年唔過情人節,下年就可能唔洗過啦!情人節最緊要喺浪漫,就算今年無得玩燭光晚餐(無晚市仲點燭,JOKE就有份),都可以透過餐廳環境同美食搭救。按得入嚟睇嘅應該都係未諗好去邊,但兄弟唔使驚,今日我就介紹幾間餐廳比大家參考下。

ZENG-Sous Vide Beef Cheek with Teriyaki Sauce。

1.ZENG

酒吧餐廳ZENG位於銅鑼灣心臟地帶,有觀景露台可以270度俯覽九龍半島及維港,主打特色雞尾酒同一口美食。設有情人節午餐,主菜包括慢煮牛頰肉配照燒汁、味噌烤智利鱸魚扒配柚子醬油或巴馬火腿野菌烤雞卷佐紅酒醬,依家訂仲有早烏優惠$780(原價$880),如果好想坐窗邊位記得打去問下安唔安排到先啦。

Mr Brown-Iberico Pork muffin。

2.Mr Brown

女朋友或者自己畏高坐唔到窗邊位點算?咁可以考慮下Mr Brown,餐廳位於灣仔船街,主打煙燻和燒烤美食,各位情侶無得去BBQ(被政府封曬爐啦)都可以喺節日裡享受新鮮熱辣燒烤風味美食。經典菜色包括Mr Brown自家製伊比利亞黑毛豬英式鬆餅配芥末和蒜泥蛋黃醬,及鯖魚忌廉配三文魚子和椒鹽脆餅。情人節更特備的辣椒茴香烤虎蝦、和牛肋眼扒,配上焦香芝士蛋糕配車厘子雪葩,或朱古力泡芙作為甜點,套餐定價為每位$450。

LucAle-Black Cabbage Ravioli。

3.LucAle

餐廳由意大利專業美食家、名廚創建,位於西營盤第三街一個幽靜小巷入面。餐廳推出情人節限定早午餐,只需$380即可任飲Laherte Freres香檳,包括了無限量Salumi、香滑Burrata芝士及新鮮Mozzarella芝士,最啱用嚟配香檳,而且每對用餐愛侶更可獲贈玫瑰花,昇華甜蜜氣氛。

「條街咁多人又多菌,唔想出街迫喎,有冇其他選擇啊?」當然有啦,如果大家想留返喺屋企「Sweet Sweet」,但廚藝又未去到可以煮返餐勁嘅比女友,可以考慮叫外賣,唔使驚唔係叫你去叫「袋鼠」同「熊貓」,而係有餐廳推出情人節外賣套餐,食得又睇得,絕對可以畀女女打卡呃LIKE。

TATE DINING ROOM-Valentines Gastronomy Set。

4. TATE DINING ROOM 

米芝蓮二星餐廳TATE Dining Room最近推出情人節美食盒,入面包含了Billecart-Salmon Brut Sparkling Rose NV 粉紅氣酒一支 ,魚子醬藍蝦配紫椰菜花忌廉及牛肉濃湯啫喱配牛舌和菊芋等時令前菜;而主菜則可從紅酒燴牛肉及鱈魚配帶子慕絲中任選其一。最後一層甜品拼盤包括蜂蜜熱情果蛋糕、一口脆蜂蜜及蜂蜜棒棒糖,每盒定價為$3000。

Honbo-牛尾潛艇堡。

5.Honbo 

如果預算All-in曬落份禮物到,想食方面簡單啲,都唔係無辦法嘅...。可以考慮選擇食漢堡,Honbo來頭唔細㗎,曾經獲得Bloomberg「全球最佳漢堡2020」、國際旅遊網站Big 7 Travel「亞洲50間最佳漢堡店 2019」(排行第十三位)及Time Out 香港「十大最佳漢堡 2017」等。為慶祝即將來臨嘅牛年,Honbo與留家廚房攜手合作推出全新牛尾潛艇堡(HK$158),由著名大廚劉晉精心準備作為主角嘅傳統中式燉牛尾,配上金黃誘人荷包蛋,帶點辛辣白洋蔥正好中和肉類的肥膩感。