文:MenClub 魏文青  
POSTED ON 09 Dec 2019
首先要講明,要對付流感呢家嘢,最好嘅方法就係睇醫生、打疫苗,但假如你冇打疫苗又瀨咗嘢,又想睇下有咩方法令自己快啲好返,咁以下呢個方法就可以一試——如果你鍾意食肉,仲一定病得好開心!
所謂生酮飲食係近年流行嘅減肥方法,非常簡單咁講就係一個高脂、低碳水化合物嘅餐單,強逼人體燃燒脂肪而非碳水化合物提供熱量從而減肥。而根據耶魯大學的一個研究,原來生酮飲食不單止會減肥,更加會激發一組平時唔會對流感病毒有反應嘅特定T細胞,繼而分泌出一股黏膜保護肺部細胞免被感染。研究人員於實驗室中證實,進食「生酮餐單」的白老鼠喺感染流感病毒後,生存率會高於進食「高碳水化合物餐單」的白老鼠。
簡單啲黎講,就係生酮飲食所產生嘅作用,會刺激人體免疫系統對抗流感病毒。研究人員亦進行咗另一個測試,發現假如缺乏該特定T細胞,生酮飲食就冇助對抗流感。換言之你患上流感之後食高脂低碳水化合物嘅嘢,或者會幫到你快啲好返,但又唔好諗住單靠咁樣就一定會好返。都係嗰句,有病你就同我去睇醫生,係睇完醫生你可以心安理得咁食好啲囉!