文:MenClub 艾力克  
POSTED ON 04 May 2021

過去廿年嚟,Sony同Microsoft一直都喺遊戲機市場鬥得你死我活。好多時為咗進步,拎競爭對手作品嚟研究一下實屬正常不過。隨著Apple同Epic Games訴訟案開打,一份Microsoft內部《TLOU2》評測文件得以曝光,入面大讚遊戲敘事設計及視覺效果為業界樹立標竿,究竟係真心定係曲線啊?

由於全文太長,所以就直接抽重點部份出嚟同大家分享。據文件顯示,兩位名為Mike及Jon嘅遊戲測試員玩完《TLOU2》後,大讚遊戲整體表現遠遠超越其他團隊喺遊戲主機或PC上製作嘅所有產品,敘事設計及視覺效果都係首屈一指。

雖然兩位畀出極高評價,不過都有可以彈嘅地方。佢哋認為《TLOU2》入面槍戰嘅情節差咗啲,同埋好困擾武器切換制全部喺十字鍵上,表示Naughty Dog似乎整唔到一個似樣啲嘅槍戰,今部作品亦唔例外,不過好彩遊戲玩法偏向潛行方式過關,所以槍戰問題對遊戲體驗影響唔大。

單以視覺效果同遊戲性方面,相信大家都會認同《TLOU2》係水準之上,但係咪好似Microsoft咁吹到勁就另作別論。眾所周知《TLOU2》最惹人爭議嘅方係在於劇情問題,呢方面兩位測試員就提出咗一個值得思考嘅見解,佢哋認為Naughty Dog犧牲咗玩家嘅主導權,令玩家唔再以「角色扮演」方法玩遊戲,而係站於「旁觀者」角度去睇住劇情推演。雖然Naughty Dog要求玩家以「旁觀者」角度切入,但實際上玩家都係要操作Ellie同Abby兩個角色,而呢種安排最終導致玩家憤怒。

資料來源:VGCscreenrant