文:MenClub 艾力克  
POSTED ON 11 Jun 2021

經典電影《侏羅紀公園》系列第六集,亦都係最後一集嘅《侏羅紀世界:統治霸權》雖然足足仲有一年時間先上映,但近日官方就率先曝光最新電影劇照及海報,並宣布將於IMAX版《Fast & Furious 9》放映前,搶先播出5分鐘前導預告。

官方最近曝光嘅海報入面,可以見到一隻蚊吸緊恐龍血,有睇過侏羅紀公園嘅朋友,就知道呢張圖係致敬緊《侏羅紀公園》第一集。故事起初就係講述科學家從一隻封印於琥珀入面嘅蚊提取恐龍DNA,繼而複製出各式各樣恐龍。另外,官方最新劇照都可以見到隻恐龍仔身上有毛,睇嚟一直被人鬧點解啲恐龍冇毛嘅《侏羅紀公園》,今次終於要加入有羽毛嘅恐怖品種。題外話,查實上一部作品《侏羅紀世界2》入面嘅Velociraptor(迅猛龍/伶盜龍)理應係有羽毛,不過片商就冇整埋啲羽毛出嚟。

至於條5分鐘前導預告,據外媒《Deadline》報導,預告會以1.90:1 IMAX螢幕,並配上奧斯卡得主Michael Giacchino精心炮製嘅音樂,帶大家穿越到6,500萬年前嘅白堊紀時期,講述隻蚊係點樣獲得恐龍DNA,同時亦會有新恐龍登場。

資料來源:Deadline