文:MenClub 艾力克  
POSTED ON 14 Apr 2021

唔夠精神揸車確實非常危險,尤其喺外國每次車程講緊要幾個鐘以上,少啲專注力都可能會出事。最近日本就喺高速公路休息站推出新馬桶,等司機喺如廁同時Check下疲勞程度,提醒司機揸幾耐車就要休息一下。

呢個新馬桶位於神奈川縣海老名服務區,距離東京大約有45分鐘車程,司機可以喺個到停低休息買下零食。其中有間鋪頭嘅蜜瓜包非常出名,曾經喺48小時內賣出2,7503個,打破健力士世界紀錄。

講返正題,最近日本記者就去咗實測,行咗入一個有「疲勞度測定」貼紙嘅廁格。

可以見到廁格入面個螢幕除咗有多國語言介面同「洗PatPat」功能,仲多咗項疲勞度測試。

選擇完年齡後,再回答現時狀態係「攰」、「有啲攰」或者「唔攰」,馬桶就會用大約60秒時間進行測量。透過廁板上嘅感應器檢測交感神經系統活動,繼而分析出疲勞程度。

檢測結果會顯示一個圖表,同埋建議司機應該每揸幾個鐘車就要休息幾多分鐘。

呢個設施確實可以幫到唔少長途車司機同減少路上意外,因為好多時候出車個一刻唔覺得攰,但預計唔到揸到半路會無精神,可以算係一個相當貼心嘅功能。至於香港就唔需要呢啲設施啦,一嚟路程短,二嚟咁多爛路震到大家無可能會瞌眼瞓。

資料來源:soranews24