文:MenClub 魏文青  
POSTED ON 26 Apr 2021

唔少女性都非常擔心自己嘅另一半會出軌,所以就不停尋求對方出軌嘅徵兆:電話反轉放檯面?一定有嘢隱瞞!去廁所踎好耐?肯定係同女人講電話!返工時間唔係秒覆訊息,一定係去咗爆房!但一個研究就發現,要知一個男人出軌機會大唔大,係唔使搞咁多嘢!只需要睇佢著咩衫——準確啲係著件衫個Logo有幾大就得架啦。

美國密哲根大學進化心理學博士 Daniel Kruger為咗研究所謂「孔雀效應」——即係女性會與乳雀一樣,依照對方外觀 (條尾) 嘅搶眼程度,得知對方嘅經濟能力以及對傳宗接代嘅投入,以決定會否被對方吸引——所以就做咗個研究。研究搵黎兩款同一個牌子、但Logo大小不同嘅名牌Polo恤衫,並要受訪男性根據不同情況,例如第一次約會、第一次見女方父母、見工、商業活動等,揀要著邊一件Polo。結果就發現男性傾向於「有競爭」嘅情況穿著大Logo款式,從而推論出「穿著大Logo衫嘅男人更在意於競爭中勝出」,「在意吸引異性而非組織家庭」。

未完架。研究仲指穿大Logo名牌衫嘅男人會對短期性關係有更高興趣、女性亦會傾向搵佢哋做短期關係伴侶,反之就係女性唔會當佢哋係長期關係嘅好選擇,男性亦對長期關係有更低興趣。換言之,就唔係一個「可靠」嘅伴侶啦。

資料來源:Eatthis.com